廣島 | 傳承百年的「熊野筆」

廣島・熊野筆的由來 🖌️

講起「熊野筆 (Kumano Fude )」，你可能會諗起化妝掃。但其實，熊野筆唔係單一品牌，亦唔只係化妝工具——佢背後係廣島縣熊野町嘅製筆文化，包含書法筆、畫筆同化妝掃等唔同種類。

**呢個小鎮同筆嘅緣分，最初竟然同外出打工有關。**

據當地流傳嘅歷史，江戶時代末期，熊野嘅居民主要靠務農維生，但因為耕地有限，單靠農業並不足以支撐生活。於是，每逢農閒，部分居民就會到奈良、和歌山一帶打工；回程時，再買入筆同墨，一邊沿途販賣，一邊返鄉。就係咁，筆逐漸走入熊野人嘅生活。

-

從賣筆，到親手製筆

後來，有居民到有馬等地學習製筆，亦有人向廣島藩嘅製筆師傅學藝，再將技術傳返熊野、教畀其他居民。原本從外地帶返嚟販賣嘅筆，慢慢變成可以喺家鄉親手製作嘅工藝。

-

從生活所需，慢慢發展成地方產業

明治時代，隨住學校教育普及，筆嘅需求增加，熊野嘅製筆業亦逐步發展。到戰後，面對書法筆需求嘅變化，部分製筆人開始向畫筆、化妝掃等方向尋找出路，令技術延伸到唔同用途。

1975年，熊野筆獲日本政府指定為「傳統的工藝品」，成為當地製筆工藝發展中一個重要里程碑。

-

留低嘅，唔只係一支筆

有趣嘅係，熊野町並唔係因為盛產製筆原材料，先成為筆嘅產地。支撐呢門工藝嘅，係人們從外地學返嚟嘅技術，以及一代代嘅摸索、改良同傳承。

—

資料參考：熊野筆事業協同組合、熊野町美術博物館「筆之里工房」、熊野町官方網站。

文字整理：三木日和｜Haru rah